Solar Lagwate Waqt 8 Common Galtiyan — Durg-Bhilai Buyers ke liye

1. Ek mahine ka bill dekh kar sizing karna

Durg-Bhilai mein garmi aur sardi ke bill mein bada farak hota hai. May ka bill dekh kar size tay karenge to system zaroorat se bada lag jaayega, aur extra export ki units ka poora value nahi milta. Pichhle 12 mahine ka average lijiye.

2. Shadow ko ignore karna

Paani ki tanki, mumty, paros ki deewar aur ped — inki shadow 9 AM se 4 PM ke beech chalti rehti hai. Ek panel par partial shadow poore string ka output girati hai. Survey mein din ke teen alag time par shadow check hona chahiye, ek baar nahi.

3. Non-DCR panel par subsidy ki ummeed

Subsidy ke liye DCR module chahiye. Non-DCR sasta milta hai aur kuch vendors bina bataye wahi laga dete hain — phir subsidy application reject ho jaati hai. Quotation par DCR status likhwaiye aur delivery par serial number check kijiye.

4. Sanctioned load check na karna

CSPDCL aam taur par sanctioned load se zyada capacity sanction nahi karta. Agar load badhana hai to woh application shuru mein lagni chahiye — baad mein pata chalne par poora process peeche khisak jaata hai.

5. Balance-of-system ko scope se nikal dena

Earthing, lightning arrester, ACDB/DCDB aur proper DC cable — quote kam dikhane ka sabse aasan tareeka inhe scope se nikalna hai. Yeh cheezein pehle din nahi dikhti, pehle monsoon mein dikhti hain.

6. Net meter ka follow-up na karna

System chalu ho gaya lekin net meter nahi laga — iska matlab hai ki aapki export ki units ka koi record nahi ban raha. Har mahine ki deri ka seedha financial nuksan hai.

7. ‘Subsidy ke baad price’ wale quote par bharosa

Subsidy aapko commissioning ke baad DBT se milti hai, vendor ko nahi. Jo vendor subsidy-adjusted price dikhata hai, woh aapse poora amount hi le raha hota hai — bas presentation alag hai.

8. Poora payment pehle de dena

Payment schedule mein commissioning ke baad ke liye ek hissa bachna chahiye. Yeh sabse simple tareeka hai yeh ensure karne ka ki kaam poora aur time par khatam ho.